Dende a biblioteca da EOI de Lugo queremos unirnos á conmemoración do Día Internacional da Educación, cuxo lema deste ano é “Aprender para unha paz duradeira”.

Un compromiso activo coa paz é imprescindible. A educación é fundamental neste labor, como subliña a Recomendación da UNESCO sobre a Educación para a Paz, os Dereitos Humanos e o Desenvolvemento Sostible. Por iso, nun mundo que asiste a unha onda de conflitos violentos ao mesmo tempo que a un aumento alarmante da discriminación, o racismo, a xenofobia e a incitación ao odio, “a aprendizaxe para a paz debe ser transformador e contribuír a dotar aos estudantes dos coñecementos, valores, actitudes, competencias e comportamentos necesarios para converterse en axentes de paz nas súas comunidades”.

Reflexionando sobre como debería ser a escola do futuro, gustaríanos facer referencia ás palabras do coñecido profesor de física italiano Vincenzo Schettini (@lafisicachecipiace): “Para min, a escola do futuro é o profesor libre, libre como eu para traballar a tempo parcial e decidir traballar tamén en liña. Libre para moverse. Tamén vexo clases desconectadas deste mecanismo de cambio continuo de leccións que funcionou ben nos anos setenta. Durante unha conferencia escoitei que a figura de Leonardo era multifacética. Pregunteime: por que Leonardo era polifacético? Temos que pensar niso. Era polifacético porque Leonardo facíao, usaba as mans. A partir dese “facer” desenvolveu curiosidade por moitos campos, moitos temas. Se a escola empezase a basearse máis no laboratorio, se permitise ao alumnado rotar (non aos profesores que hoxe sempre teñen que mirar o reloxo), se cambiase esta forma de gozar a escola, cambiaría totalmente a forma de aprender do alumnado. O alumnado de hoxe, especialmente o máis novo, ten unha mentalidade moito máis aberta que antes. Se fas que os estudantes sigan catro camiños de coñecemento ao mesmo tempo, STEM, humanístico, lingüístico e artístico (eu engadiría tamén as disciplinas físicas), os estudantes conseguen percorrer todos os camiños en paralelo. Son moito máis rápidos que nós. Os que somos lentos somos nós, pero non é culpa dos profesores que están a facer todo o posible para adaptarse, cambiar, abrazar as novas tecnoloxías. Isto é o que soño para o futuro.”

“A elección dun alumno depende das súas preferencias pero tamén da
sorte de atopar a un gran profesor”

Rita Levi Montalcini