Sabías que sendo usuario/a da biblioteca escolar da EOI de Lugo podes ter acceso á plataforma de préstamo dixital E-LBE.2? E-LBE.2 é un servizo complementario que poden ofrecer as bibliotecas escolares dos centros educativos galegos de titularidade da Consellería de Educación, Ciencia, Universidades e Formación Profesional, integrados no Plan de mellora de bibliotecas escolares (Plambe). Trátase dunha plataforma de lectura e préstamo de contidos dixitais que enriquece as coleccións das bibliotecas escolares. Cun volume actual de preto de 4000 títulos, e en continua ampliación, están dispoñibles para ler en pantalla, en todo tipo de dispositivos (computador e dispositivos móbiles), en calquera momento e lugar, para todas as persoas usuarias (profesorado, alumnado e familias) dunha biblioteca escolar Plambe, como a da EOI de Lugo.
Os fondos de E-LBE.2 son variados, actuais e están seleccionados atendendo aos criterios que, en xeral, seguen as bibliotecas escolares galegas. A selección, xestión e control dos contidos e a súa actualización coordínanse desde a Asesoría de Bibliotecas Escolares. Desde o punto de vista lingüístico, predominan os materiais en galego e castelán, mais tamén se poden atopar recursos noutras linguas como inglés e francés.
O acceso á plataforma dixital está vencellado directamente á biblioteca escolar, polo que é necesario estar previamente rexistrado/a como usuario/a na biblioteca da EOI de Lugo. Admítense tres perfís diferentes: usuario alumnado (ata 2 préstamos de xeito simultáneo, cun máximo de 10 títulos durante o curso escolar), usuario docente (ata 2 títulos de xeito simultáneo sen límite de préstamos) e outras persoas usuarias da comunidade educativa (ata 2 préstamos de xeito simultáneo, cun máximo de 10 títulos durante o curso escolar).
Para evitar préstamos indesexados, recoméndase explorar os contidos da plataforma de xeito anónimo e entrar con nome de usuario/a e contrasinal soamente cando se requira para tramitar un préstamo, por exemplo.
Se es usuario/a da biblioteca da EOI de Lugo e queres realizar préstamos de contidos dixitais na plataforma E-LBE.2, contacta co equipo de biblioteca, indicando o teu nome completo, para solicitar os datos de acceso que precisas. Podes escribir un correo electrónico a eoi.lugo.biblioteca@edu.xunta.gal.
