A nosa elección da Sociedade Protectora de Animais e Plantas de Lugo vén motivada polo noso compromiso de contribuír ao benestar dos animais abandonados na nosa provincia. A Protectora de Lugo ten urxentes necesidades de mellora, tanto no que respecta á reforma das instalacións, que teñen máis de 40 anos de antigüidade, como aos problemas de espazo, debido ao gran número de gatos e cans que son abandonados anualmente. Cremos firmemente que unha sociedade avanzada debe respectar e coidar da vida animal. Unha vez que decidimos adoptar un animal doméstico debemos ser conscientes de que adquirimos un compromiso de por vida cun ser que sente e sofre e que depende totalmente de nós, pero iso si, que tamén nos aportará a compaña e o amor máis verdadeiro que poidamos imaxinar.

Visitade a páxina https://protectoralugo.org e animádevos a coñecer a todos os marabillosos cans e gatos que están agardando unha oportunidade. Tedes a opción de adoptar, acoller (se podedes ofrecer temporalmente un fogar a un destes animais) ou apadriñar, se queredes colaborar economicamente no seu coidado. Ademais, outra axuda moi valiosa consiste en unirse ao voluntariado, indo ás instalacións para facer compaña e/ou pasear aos numerosísimos gatos e cans albergados alí e, deste xeito, contribuír a garantir o seu benestar físico e emocional, xa que desafortunadamente teñen que pasar demasiado tempo nos canís. Recompensaranvos con todo o amor, a ledicia e a dozura que son capaces de dar (que é moita). E se lles levades unha lambetada, aínda mellor.