As persoas máis familiarizadas coa biblioteca escolar de seguro que xa observaron os numerosos libros que están agardando por unha Cita ás cegas xunto ás fiestras. Un ano máis, o equipo de biblioteca propón esta actividade de promoción da lectura durante as vacacións de Nadal e sorterá unha comida ou cea para dúas persoas nun restaurante de Lugo entre os alumnos e as alumnas que realicen préstamos sorpresa e valoren a lectura a través dunha tarefa escrita ou oral na Aula Virtual. Os préstamos da actividade Cita ás cegas poderán realizarse en persoa na biblioteca entre os días 2 e 20 de decembro, mentres que a tarefa para participar no sorteo poderá entregarse entre o 9 de decembro e o 19 de xaneiro ás 23.59h a través da Aula Virtual (no espazo específico de Biblioteca, que aparece como un curso máis no que se está matriculado/a).
BASES DO CONCURSO CITA ÁS CEGAS 2024/2025
1. ORGANIZACIÓN. A actividade está organizada pola Biblioteca da Escola Oficial de Idiomas de Lugo, que pode ser contactada a través de correo electrónico [eoi.lugo.biblioteca@edu.xunta.gal].
2. PROPÓSITO E PÚBLICO OBXECTIVO. Trátase dunha actividade de promoción da lectura e implicación da comunidade escolar que inclúe un sorteo entre todas as achegas de tarefas relacionadas con préstamos de Cita ás cegas. Admítese a participación de todo o alumnado matriculado na Escola Oficial de Idiomas de Lugo no curso 2024/2025, tanto en cursos regulares presenciais e semipresenciais das diferentes linguas e do programa That’s English, como en cursos monográficos e de preparación de exames Celga.
3. PRAZOS E CONDICIÓNS DE PARTICIPACIÓN. Os préstamos de libros da actividade Cita ás cegas deberán realizarse presencialmente na biblioteca entre os días 2 e 20 de decembro de 2024. Poderán realizarse ata tres préstamos simultáneos de libros na mesma ou en diversas linguas. As persoas que desexen participar no concurso deberán realizar e entregar alomenos unha tarefa relacionada cun préstamo na lingua do mesmo a través da Aula Virtual da Escola Oficial de Idiomas de Lugo (curso específico de Biblioteca, no que todo o alumnado está matriculado e ten acceso). A data límite de realización e entrega desta tarefa é o 19 de xaneiro de 2025 ás 23.59h. A tarefa poderá ser realizada e entregada en formato escrito e/ou en formato oral. No caso de realizar varios préstamos da actividade Cita ás cegas nunha mesma lingua e querer entregar unha tarefa correspondente a cada lectura, o número máximo de tarefas entregadas por idioma será de dúas e deberán ser de diferente modalidade (escrita e oral).
4. FORMA DE PRESENTACIÓN. As respostas ás tarefas propostas serán introducidas no formulario da lingua correspondente á lectura (alemán, chinés, español, francés, galego, inglés, italiano e portugués). As respostas deberán estar escritas ou relatadas oralmente na mesma lingua da lectura realizada. As respostas ás preguntas das tarefas serven como evidencia da lectura. Non se considerará o nivel de competencia lingüística nin a complexidade narrativa das mesmas no concurso. No caso de niveis A1 e A2 permitiranse respostas que empreguen a lingua de lectura no caso de alemán, chinés, francés, inglés, italiano e portugués e o galego como lingua vehicular. No nivel A2 de ELE (español para estranxeiros) tamén se permitirá combinar español e outra lingua estranxeira de estudo na Escola Oficial de Idiomas de Lugo (alemán, chinés, inglés, italiano ou portugués). A partir do nivel B1 incluído será necesario empregar exclusivamente a lingua de lectura na tarefa.
4. SORTEO E PREMIO. O día 20 de xaneiro de 2025 realizarase un sorteo entre todas as achegas de tarefas relacionadas con préstamos da actividade Cita ás cegas. O alumnado que resulte afortunado será contactado o día 21 de xaneiro de 2025 por correo electrónico, empregando os datos de contacto indicados durante a matrícula do curso 2024/2025. Haberá un único premio, que será un vale para unha comida ou cea para dúas persoas nun restaurante de Lugo por valor de 50 euros.
5. DEREITOS DE AUTOR E DIFUSIÓN. A Escola Oficial de Idiomas de Lugo resérvase o dereito de reprodución, publicación e difusión das recensións durante un prazo máximo de 1 ano. Os autores ceden, sen contraprestación económica, o dereito de publicar os seus textos escritos ou orais na web e nas redes sociais da Escola, co único obxectivo de divulgar os resultados da actividade e fomentar a lectura crítica. Os autores poderán facer uso dos seus dereitos de propiedade intelectual mencionando o premio obtido neste concurso.
6. ACEPTACIÓN DAS BASES. A participación no concurso implica a aceptación íntegra destas bases. O incumprimento dalgún dos puntos expostos conlevará a exclusión do sorteo.
7. PROTECCIÓN DE DATOS PERSOAIS. Os datos persoais dos/as participantes serán utilizados unicamente para xestionar a súa participación no concurso e para as finalidades indicadas nestas bases. En ningún caso se utilizarán con fins comerciais ou para o envío de comunicacións alleas ao concurso. O tratamento de datos levarase a cabo conforme á normativa vixente de protección de datos. As persoas participantes poderán exercer os seus dereitos de acceso, rectificación, cancelación ou oposición enviando un correo electrónico a eoi.lugo.biblioteca@edu.xunta.gal ou dirixíndose á Escola Oficial de Idiomas de Lugo conforme ao establecido na Lei 39/2015, do 1 de outubro, do Procedemento Administrativo Común das Administracións Públicas.
